കഴിഞ്ഞ പതിനൊന്നു മണിക്കൂറുകളായി അവര്‍ പത്തു പേര്‍ ഈ ഏസി മുറിയില്‍ ഒരു ചതുര മേശക്ക് ഇരു പുറവുമായിട്ട് എംഡിയുടെ മുഖത്തു നോക്കിയിരിക്കുന്നു. രാവിലെ പത്തു മണിക്കാണ് കോട്ടും സ്യൂട്ടും സുഗന്ധങ്ങളും സ്യൂട്ട് കേസുകളുമായിട്ട് ഏഴു സുന്ദരന്മാരും ഒരേ നിറത്തിലുള്ള സാരിയും ബ്ളൗസും ധരിച്ച്, വ്യത്യസ്തമാര്‍ന്ന മൂന്നു മണങ്ങളില്‍ മൂന്നു സുന്ദരികളും വന്നിട്ടുള്ളത്. സുന്ദരികള്‍ക്ക് സ്യൂട്ട് കേസുകളില്ല. അവരോടൊത്ത് മാറില്‍ അടക്കിപ്പിടിക്കപ്പട്ട് മൂന്നു ഫയലുകളുമാണെത്തിയത്.
കോണ്‍ഫ്രന്‍സ് തുടങ്ങി ഇത്തിരി നേരം കഴിഞ്ഞ് കമ്പനി എത്തിച്ചു കൊടുത്ത പ്രഭാത ഭക്ഷണം കഴിച്ചു, അവിടെയിരുന്നല്ല, ഭക്ഷണ മുറിയില്‍ പോയിരുന്ന്. യഥാസമയം മത്സ്യവും മാംസവും ഉള്‍ക്കൊണ്ട ഉച്ച ഭക്ഷണവും, സായാഹ്നത്ത് ലഘു ഭക്ഷണവും കഴിച്ചു.
സംസാരങ്ങള്‍ നീണ്ടു പോയി.
ആ കോണ്‍ഫ്രന്‍സ് ഹാളിനു പുറത്ത്, ഹാളിനെ പൊതിഞ്ഞ് വലിയൊരു കെട്ടിടമുണ്ട്. അവിടെ പ്രവിശ്യയാകെ അറിയപ്പെടുന്ന ഒരു ചാനല്‍ പ്രവര്‍ത്തിക്കുന്നു. ഓഫീസും റെക്കോഡിംഗ് റൂമും, ഇന്‍ഡോര്‍ ഏരിയയും എയറിംഗ് സിസ്റ്റവും…..
അവര്‍ക്ക് വേണ്ടത് തകര്‍ന്നുകൊണ്ടിരിക്കുന്ന ചാനലിനെ പിടിച്ചു നിര്‍ത്തുക എന്നതാണ്. വാര്‍ത്തകള്‍, സീരിയലുകള്‍, സംഗീത-നൃത്ത റിയാലിറ്റികള്‍, കോമഡി ഷോകള്‍, കുട്ടിക്കളികള്‍, വലിയവരുടെ കളികള്‍, അടുക്കള ഷോകള്‍, വീട്ടു കളികള്‍, അച്ഛനുമമ്മയും കളികള്‍, നിരത്തിലിറങ്ങി പൊതുജനത്തെ വിഡ്ഢിയാക്കല്‍, ചാക്കിലോട്ടം, സൂചിയില്‍ നൂലു കോര്‍ക്കല്‍, ആനയ്ക്ക് വാലുവര….
എല്ലാം കാണിച്ചുകഴിഞ്ഞിരിക്കുന്നു, ആവര്‍ത്തിച്ചു കൊണ്ടുമിരിക്കുന്നു.
ഒന്നും റേറ്റിംഗ് കൂട്ടുന്നില്ല.
മറ്റു ചാനലുകാരുടെ തന്ത്രങ്ങളില്‍ തോറ്റു പോകുന്നു.
പരസ്യങ്ങള്‍ കിട്ടാതായിരിക്കുന്നു.
പ്രതിസന്ധിയിലായിരിക്കുന്നു.
പുതിയതൊന്നിനു വേണ്ടിയുള്ള ചര്‍ച്ചയാണ് നടക്കുന്നത്.
ഏ ന്യൂ ജനറ്റിക് ഐറ്റം…..
പ്രവിശ്യയില്‍ തന്നെയുള്ള ചാനലുകളിലേക്ക് ഒളിഞ്ഞു നോക്കി, കോപ്പിയടിക്കാന്‍ പറ്റിയതൊന്നും കണ്ടില്ല.
തമിഴ് നാട്ടിലും കര്‍ണ്ണാടകത്തിലും മഹാരാഷ്ട്രയിലും നോക്കി…
നോട്ടും വടക്കോട്ടു പോയി…
ഹിമാലയം കടന്നു പോയി…
കടലുകളും കടന്നു പോയി….
എംഡി ഇടക്കിടയ്ക്ക് മുരണ്ടു.
നോ…നോ…ഇറ്റസ് നോ ന്യൂ…
നോ വെറൈറ്റി…
സൂര്യന്‍ ജോലി കഴിഞ്ഞു പോയി.
കോണ്‍ഫ്രന്‍സ് ഹാളിന് പുറത്ത് ജോലി ചെയ്തിരുന്നവരില്‍ പലരും മടങ്ങി, പുതിയവര്‍ വന്നു.
കോണ്‍ഫ്രന്‍സ് ഹാളിലെ ഏസി ഓഫ് ചെയ്ത് എക്സോസ്റ്റിനെ ശക്തിയായി കറങ്ങാന്‍ അനുവദിച്ച്, മുറിയിലേയ്ക്ക് ഹോട്ടും സോഫ്റ്റും നട്ട്സും ബദാം പരിപ്പും മറ്റ് അനുസാരികളും വന്നു.
കോട്ടുകളുടെ ബട്ടനുകളെ ഊരി, ടൈയ്യുടെ കുടുക്കിനെ അയച്ച് സുന്ദരന്മാരും ഒന്നും ഊരിക്കളയാനില്ലല്ലോ എന്ന് ശങ്കിച്ച്, ചിലതൊക്കെ ലൂസാക്കി വച്ച് സുന്ദരികളും സന്തോഷം കൊണ്ടു.
എന്നിട്ടും എംഡി രാവിലെ മുതല്‍ ഉന്നയിക്കുന്ന ചോദ്യം ദേഹത്ത് പുഴുവരിച്ചതുപോലെ തിണര്‍ത്തു നിൽക്കുന്നെന്ന് പലര്‍ക്കും തോന്നി.
ഏ ന്യൂ ഐറ്റം……ന്യൂ റിയാലിറ്റി ഷോ….
മദ്യം നുകര്‍ന്നു. വേണ്ടാത്തവര്‍ സോഫ്റ്റ് നുണഞ്ഞു. അനുസാരികള്‍ നാവില്‍ പുരട്ടി… സിഗരറ്റു പുകച്ചു…..
ഹാളില്‍ നിലനിന്നിരുന്ന സുഗന്ധങ്ങള്‍ പുറത്തേക്കിറങ്ങിപ്പോയി.
മദ്യത്തിന്‍റെ, പുകയുടെ ഗന്ധം നിറഞ്ഞു.
ദേഹങ്ങള്‍ വിയര്‍ത്തു. ലേപനങ്ങള്‍ കുതിര്‍ന്നൊഴുകി…
ഐ സെ വണ്‍തിംഗ്…
സുന്ദരന്മാരിലെ ബുദ്ധിജീവി പറഞ്ഞു.
മുടി നീട്ടി വളര്‍ത്തി ഷേവു ചെയ്യാത്ത പഴയ തരം ബുദ്ധിജീവിയല്ല. ന്യൂ ജെന്‍…
നിത്യേന ഷേവ് ചെയ്ത്, മുഖം മിനുക്കി, ഹെയര്‍ ഓയില്‍ പുരട്ടുന്ന സുന്ദരന്‍.
ക്വട്ടേഷന്‍…
വാട്ട്…
പത്തു സ്വരങ്ങള്‍ ചേര്‍ന്ന് ഒരു ‘വാട്ട്’ ആയി പുറത്തു വന്നു.
അയാള്‍ ഒന്നും പറയാതെ ഒരു സിപ്പ് കൂടി എടുത്ത്, അനുസാരി നാവില്‍ തേച്ച് അക്ഷോഭ്യനായി…
ഏസ്, ക്വട്ടേഷന്‍ റിയാലിറ്റി ഷോ…
ഹൗ…
കൃത്യങ്ങള്‍ പാര്‍ട്ടിപ്പന്‍സിന്‍റെ ഒത്താശയോടെ രഹസ്യമായിട്ട് ഷൂട്ട് ചെയ്ത് കാണിക്കണം…. ലൈവായിട്ട് അവരുടെ ആക്രോശങ്ങലും ഭാവങ്ങളും വീമ്പുകളും ശരീരങ്ങളും തീറ്റയും കുടിയും കാണിക്കണം.
ഏഴു സുന്ദരന്മാരുടേയും മൂന്നു സുന്ദരികളുടേയും മുഖങ്ങള്‍ തെളിഞ്ഞു, പഴയ ട്യൂബ് ലൈറ്റു പോലെ….
അവര്‍ മുകളിലേക്ക് നോക്കി.
ഓ…ഗോഡ്… യുവര്‍ ഗുഡ്നസ്സ്….
ഉന്നതങ്ങളിരിക്കുന്നവനെ…നിനക്കു സ്തുതി….നീ ഞങ്ങളില്‍ കനിഞ്ഞിരിക്കുന്നു….
നിനക്ക് നന്ദി….
@@@@@